Kirjä om saanu tuhat suidsusanna
Avaldatud: 20 March, 2026
Suidsusannu üle-eestilidsel kokkolugõmisõl om edimese aastaga joosul kirjä saanu tuhat sanna. Kõgõ rohkõmb om sannu Vanal Võromaal, a ka mujjal Lõunõ-Eestin. Veebikaardi pääl omma nätä neo 550 suidsusanna, mille umanigu omma lubanu sanna asukotust kaardi pääl vällä näüdädä. Kokkolugõmist kõrraldas Vana-Võromaa suidsusannu kuuntüükogo.
Tuhandõst kirjä saanust sannast om 750 puhul vastatu pikembält ka perre sannakombidõ kotsilõ. Näütes om jakkuvalt kombõs suidsusannan vihtlõminõ: kats kolmandikku sannaliisist vihtlõs alasi, kolmas jago mõnikõrd ja õnnõ 2% vihtlõ-i sukugi. Pallo lugusit om kirjä pantu sannu aoluu kotsilõ ja teedä om ka suidsusanna tulõvik: 640 vastanu sõnno perrä käävä suidsusannan ka näide latsõ. Nii või usku, et sannal om uma kotus ka noorõmbide põlvkundõ elon ja suidsusann üten ummi kombidõga püsüs edesi.
Loendusuurmisõst joba korjunu ja viil mano tulõva tiidmise tollõ kotsilõ, ku tähtsä om suidsusann mi elokõrraldusõn, saami edesi anda ummilõ latsilõ ja latsõlatsilõ. Õnnõ ütetaolidsõmbas muutuvan ilman om suidsusanna vägi alalõ jäänü ja püsüs mi põlidsõn kultuurin edesi.
Tüürühm tennas kõiki, kiä omma joba ummi sannalugusit jaganu. Tuhat sanna omma teedä, aga arvada om viil mõni tuhat suidsusanna, mink kotsilõ olõ-i märki saadu. Ülelugõminõ jakkus, sanna saa esi kirjä panda veebiankeedi kaudu, a või ka kirjapandja kohapääle sanna kaema ni sannajuttõ üles tähendämä kutsu.
Vana-Võromaa suidsusannakombõ omma UNESCO vaimlidsõ kultuuriperändüse esindüsnimistün aastagast 2014. Sannaumanigõ hää abiga tahetas selgembäs saia sannu hulk ja uuri sannakombit. Ettevõtmist tugõ Eesti Rahvakultuuri Keskus.
Veebikaardi suidsusannu kotsilõ löüd Maa- ja Ruumiammõdi kaardiaidast: https://xgis.maaamet.ee/xgis2/page/app/suitsusaunad.
Loendusõ ankeeti saa täütä veebin: savvusann.ee pääl, abis om videooppus. Sannast või teedä anda ka õkva loendusõ iistvõtjilõ kõlistadõn vai kirotadõn.
Täpsämbät teedüst saa:
Puksingu Marko
sannu kokkolugõmisõ iistvõtja
marko.puksing@ut.ee
tel 511 7446
Eichenbaumi Külli
Vana-Võromaa suidsusannu kuuntüükogo esindäjä
kylli.eichenbaum@gmail.com
tel 5661 1924