Avaldatud: 23 September, 2026

Suidsusannu loendusõl om teedüst korjat päält 1200 sanna kotsilõ

Tinavaasta sügüsedses käänüpääväs om suidsusannu kokkolugõminõ andnu tiidmise 1224 sanna kotsilõ, noist ligi tuhandõ kotsilõ om korjunu pilte ni täämbädse ao sannakombidõ perimüst. Loendus om käünü puultõist aastagat ja sannu saa jakkuvalt kirjä panda veebiankeedin kodolehe savvusann.ee pääl.

Suidsusanna ja sannakombõ omma avvu seen. Seod näütäs asjalugu, et kirja pant sannust üle tuhandõ omma pruukmisõn – noid sannu kütetäs ja sääl käüdäs.

Kõgõ inämb omma sannaumanigu vastanu küsümiisile sanna kütmise kotsilõ. Inämbüs pruuk kütmises õnnõ lehepuud ja kõgõ parõmbas peetäs lepäpuud. Kats kolmõst kütt sanna lepäga vai päämädselt lepäga. Lehepuud timä liigi pääle kaemalda pand sannaahjo neläs jago sannakütjit. Rohkõmb nimmati kõivu ja haaba, a lövvüs ka peremiihi, kinkal jakkus ahokütmises uibuid. Õnnõ üts kümnest kae-ei sukugi puuliiki ja kütt tuu puuga, midä täl parajalõ võtta om. Ütsigu sanna saava köetüs kas kuusõ vai pedäjäga, midä suidsusannu kütmise man piäsi pelgämä: nõglapuu pill kõvva kibõnit.

Süküskuu alostusõst naksi sannauurja ütsikasjalidsõmbalt läbi kaema loendusõ käügin sannakombidõ ni -tiidmiisi kotsilõ korjunu teedüst. Põnõvit lugusid ja vahtsõt tiidmist jaga tüürühm huviliisilõ sügüse joosul, talvõpühhis piäs saama ülekaehusõ kõgõ korjunu kotsilõ.

Olku et tüü andmidõ läbikaemisõ ja tõlgutamisõga jo käü, saa sannu iks viil kirjä panda. Savvusanna kodolehe päält löüd veebiankeedi lihtsäle üles. Siiäni tettü välätüü lupas arvada, et vähämbalt Vanal Võromaal om külh viil mõni tuhat sanna, miä omma kirja pandmalda. Loendusõ kõrraldaja omma sannaumanigulõ ankeedin antuist lubamiisist kinnipidämisega häste hoolõn: ku umanik ei taha, et tõsõ timä sanna kotsilõ midägi teedä saanu, sõs niimuudu ka om.

Veebikaardi pääl omma nätä neo 650 suidsusanna, mille umanigu omma lubanu umma sanna näüdädä. Massa-i murõhta, et huvilidsõ nakkasõ huuvi sisse murdma – sannaumanigu olõ-i säändsest murrõst teedä andnu ja üttegi sanna olõ-i pidänü kaardi päält maaha võtma.

Vana-Võromaa suidsusannakombõ omma UNESCO vaimlidsõ kultuuriperändüse esindüsnimistün aastagast 2014. Sannaumanigõ hää abiga tahetas selgembäs saia sannu hulk ja uuri sannakombit. Kokkolugõmist kõrraldasõ Võro Instituut ja Vana-Võromaa suidsusannu kuuntüükogo, ettevõtmist tugõ Eesti Rahvakultuuri Keskus.

Veebikaardi suidsusannu kotsilõ löüd Maa- ja Ruumiammõdi kaardiaidast: https://xgis.maaamet.ee/xgis2/page/app/suitsusaunad.

Loendusõ ankeeti saa täütä tan: https://savvusann.ee/loendus/

Abis om video-oppus: https://www.youtube.com/shorts/IeoEXNQa4zY

Sannast või teedä anda ka õkva loendusõ iistvõtjilõ kõlistadõn vai kirotadõn, kontakti omma tan allpuul.

Teedüse man om pilt vahtsõ suidsusanna kütmisest, foto om Pähnä Tuuli eräkogost.

 

Täpsämbät teedüst saa:

Puksingu Marko

sannu kokkolugõmisõ iistvõtja

marko.puksing@ut.ee

tel 511 7446

 

Veeroja Eda

Vana-Võromaa suidsusannu kuuntüükogo liige

eda.veeroja@gmail.com

tel 503 2341

<< Tagasi