Avaldatud: 21 June, 2025

Ülekaehus savvusannu kokkolugõmisest suvidsõl käänüpääväl  2025

Vana-Võromaa suidsusannu kuuntüükogo iistvõtmisõl alustõdi keväjädsel käänüpääväl suidsusannu kokkolugõmine. Plaanin om kokko lukõ kõik Eestin olõva suidsusanna ja uuritas ka sannakombidõ kotsilõ nii Vanal Võromaal ku terven Eestin.

Suvidsõs käänüpääväs on tiidmist korjunu jo 500 suidsusanna kotsilõ. Perimüseuurja Võro Instituudist omma jõudnu üle kaija piä nelläsaa sanna kotsilõ tulnu teedüst ja pilte. Peris hulka om sannaumanikke, kiä omma saatnu meile uma sannu lugusid ja pandnu kirjä perre sannakombit. Om saadõt ka pikembit kirätüüsid ja pilte suidsusanna remontimisest. Üles om võet põnõvit ehitüse-lahendüisi midä sannaehitäjä umal aol omma vällä märknü.

Midä huvitavat om sõs joba teedä saadu?

Prõllatsõs korjunu andmõ näütäse, et suidsusannu om kõgõ inämb Vanal-Võromaal ja tan lähiksel, mujjal Eestin om näid harvõmbalt. Kaardi pääle pantuna om pilt küländ ütesugumanõ tuuga, midä kolm põlvõ tagasi Habichti Tamara uma uurmistüüga löüdse.

Silmä jääs vahtside suidsusannu hulk. Viimätse põlvkunna joosul (25 aastat loetas ütes põlvkonnas) on vahtsõst ehitet/vannust ümbreehitet 120 suidsusanna, noist poolõ omma ehitet viimätse kümne aastaga joosul. Vanõmbit ku 100 aastakka om saman hulgan ku vahtsit ja inämbüs korgõ vannusõga sannu om pruugin ka täämbä. Läbi egäsugustõ aigõ omma perre ummi suidsusannu kõrran hoitnu ja üten seoga omma jakkuvalt avvun ka sannakombõ.

Suidsusannu kokkolugõmine käü edesi! Ku ti perrel vai tutvil om suidsusann midä olõ-i viil üle loet – võtkõ suvitsõl aol tuu jupikõnõ aigu ja teke är! Nutiktelefooni vai puutriga saa lihtsäle e-ankeedi är täütä: lingi löüd veebilehe savvusann.ee päält, abis om videojuhatus. Loendusõlõ saa sannast teedä anda viil mitund muudu, tuud tulõ kokko leppü loendusõ kõrraldajatega.

Vana-Võromaa suidsusannakombõ omma UNESCO vaimlidsõ kultuuriperändüse esindüsnimistün aastagast 2014, a ku pallo ja määndse mi sanna omma, määndsist kombist peetäs luku – tuu kuigi selge olõ-i. Sannaumanigõ hää abiga tahetaski prõllanõ sais selges tetä. Ettevõtmist tugõva Eesti Rahvakultuuri Keskus ja Eesti Kultuurkapitali Võromaa ekspertgrupp.

 

Ülekaehusõ man om pilt seo aastaga kõgõ vahtsõmbast suidsusannast, miä sai valmis lehekuun. Sann om  Saarõmaal ja ehitivä timä meistremehe Vanalt-Võromaalt.

 

Täpsämbät teedüst saa:

Eichenbaumi Külli

Vana-Võromaa suidsusannu kuuntüükogo liigõ

kylli.eichenbaum@gmail.com

tel 5661 1924

 

Puksingu Marko

sannu kokkolugõmisõ iistvõtja

marko.puksing@ut.ee

tel 511 7446

<< Tagasi