Avaldatud: 22 September, 2025

Vana-Võromaa suidsusannu kuuntüükogo iistvõtmisõl käü suidsusannu kokkolugõminõ, teedüst sannu kotsilõ om tulnu üle Eesti, kõgõ inämb om sannu kirja pantu Vanalt Võromaalt.

Sügüsedses käänüpääväs om kirja pantu 560 sanna, teedüst om kogonõnu viil paarisaa sanna kotsilõ. Ütenkuun Maa- ja Ruumiammõdiga om valmis saanu ka suidsusannu veebikaart, kon om nätä üts jago kirja pantuist suidsusannust: https://xgis.maaamet.ee/xgis2/page/app/suitsusaunad.

Kaardi pääle omma märgitü sannu asukotussõ, inämbüisi om man ka pilt sannast ja lühkü lugu. Peris kõik siiäni kirja pantu sanna kaardi pääl nätä ei olõ, omma õnnõ nuu, mille umanik om andnu tollõ jaos lua. Kaardi pääl om prõlla põimukuu lõpu sais, edespiten vahtsõndadas kaarti egä kuu.

Aituma kõigilõ, kiä omma ummi sannajuttõ jaganu! Kiä olõ-i viil umast sannast teedä andnu, pallõmi löüdä sügüse joosul jupikõnõ aigu ja veebin küsümiseleht är täütä. Link om veebilehe savvusann.ee pääl. Umast sannast saa teedä anda viil mitund muudu, tuu tulõ loendusõ kõrraldajidõga eräle kokko leppü.

Vana-Võromaa suidsusannakombõ omma UNESCO vaimlidsõ kultuuriperändüse esindüsnimistün aastagast 2014, a ku pallo ja määndse mi sanna omma, määndsist kombist peetäs luku – tuu olõ-i viil kuigi selge. Sannaumanigõ hää abiga tahetaski põraaignõ sais selges tetä. Ettevõtmist tugõva Eesti Rahvakultuuri Keskus ja Eesti Kultuurkapitali Võromaa ekspertgrupp.

Ülekaehusõ man om pilt kaardist, kon omma nätä suidsusanna Eestin põraaigsidõ andmidõ perrä. Läte: X-GIS, Maa- ja Ruumiamet.

Panõ suidsusann kirjä õkva tast: https://savvusann.ee/loendus/

Täpsämbät teedüst saa:

Eichenbaumi Külli

Vana-Võromaa suidsusannu kuuntüükogost

kylli.eichenbaum@gmail.com

tel 5661 1924

 

Õitspuu Sulev

Maa- ja Ruumiammõdi

geoinfosüsteeme edendüse juht

tel 5697 0799

sulev.oitspuu@maaruum.ee

 

<< Tagasi